ФОТО: http://www.turkiyegazetesi.com.tr/
Америка собиқ Давлат котиби Генри Киссинжер шундай очиқ эътироф қилганди: “Биласизми, биз Америка ўлароқ нега кучлимиз? Биз Америка сифатида ичимиздаги Ватан хоинларини дарров йўқ қиламиз. Дунёнинг кўплаб мамлакатларидаги Ватан хоинларини эса қаҳрамонларга айлантирамиз”. Ўта қабиҳ, лекин шу билан бирга ўта очиқча баёнот. Ҳақиқатдан ҳам, бугун АҚШ бундай сиёсатини ҳеч кимдан яшираётгани, хаспўшлашга уринаётгани йўқ. Қайси мамлакатда мавжуд тузумга қарши бўлган индивид топилса, албатта, ўша заҳоти Америка унинг ҳақ-ҳуқуқларидан ўзини масъул этиб белгилайди-қўяди.
Туркияда ўтган йили давлат тўнтариши қилишга уринган FETÖ террорчи гуруҳи пешвоси Фетҳуллаҳ Гюлен ҳам айнан шундай АҚШ ҳимояси остидаги “қаҳрамонлардан” ҳисобланади. Туркий давлатларнинг кўпчилигида, хусусан Ўзбекистонда ҳам “нурчилар” гуруҳи фаолиятини йўлга қўйишга уринган, ёшларни бу оқимга жалб қилиб, у ерда фикри булғанларни турли мақомларда давлат хизматига киритиб, кейинчалик уларни юқори лавозимларга кўтариш ҳамда бу орқали давлатни бошқаришга, эркини қўлидан олишга уринган Гюлен аслида CIA (МРБ)га ишловчи жосус экани бугун ҳеч кимга сир эмас.
Ўтган йили 17 июлда бўлиб ўтган муваффақиятсиз давлат тўнтаришига уринишдан кейин Туркияда ўтказилган суриштирувлар натижасида Фетҳуллаҳ Гюлен мингларча ўз муридларини Туркия вазирликлари, армияси, хавфсизлик хизмати, полициясидан тортиб жамики бошқа идораларига киритиб улгургани маълум бўлди. Ҳақиқатдан, АҚШ разведка идоралари таълими бекор кетмагани кўзга ташланганди.
Ўтган бир йил давомида расмий Анқара АҚШдан Фетҳуллаҳ Гюленни беришни талаб этиб келмоқда. Аммо АҚШ ҳукумати ўзларига маълум сабабларга кўра, бунга қарши чиқиб, уни бермасликларини айтиб келишмоқда. Ким ҳам берарди шунча ўқитиб, ўргатилган “вафодор тозисини”!
Туркиянинг бу борада сабри тугаганга ўхшайди. Керак бўлса сенга, ол сеники бўлсин, шаклида эълон берди Туркия ички ишлар вазирлиги. Давлат тузумини ағдаришга уринган, террор гуруҳи аъзоси бўлган 130 кишидан иборат рўйхатга кирган, чет элларда қочиб юрган шахслар уч ой ичида келиб, ҳуқуқ-тартибот идораларига учрамайдиган бўлса, мавжуд қонунчиликка кўра Туркия фуқаролиги бекор қилиниши маълум қилинди. Бу рўйхатнинг 91-поғонасидан Фетҳуллаҳ Гюлен ҳам жой олган.
Демак, уч ой сўнгра Фетҳуллаҳ Гюленнинг Туркия фуқаролигидан маҳрум бўлишини кузатишимиз мумкин.
Дилмурод Жумабоев
