Европа Трампга қарши оёққа турмоқда

Article
Жума куни АҚШ президенти Дональд Трамп Вашингтонда Буюк Британия бош вазири Тереза Мэйни қабул қилди. Ўзаро ҳамкорликнинг янги босқичи ҳақида музокара олиб бордилар. Унинг якунига кўра ўтказилган қўшма матбуот анжуманида Америка раҳбари яна бир бор британияликларнинг Европа Иттифоқидан чиқишларини қўллаб-қувватлашини маълум қилди. "Brexit – бу қитъанинг бошқа давлатлари учун намуна", - деди АҚШ етакчиси. Шунингдек, референдум арафасида Шотландияга ташрифи чоғида унинг якунини тўғри башорат қилганини эслатиб ўтди. "Ўшанда менинг устимдан кулишганди. Кейинги куни эса натижа мен айтгандек бўлиб чиқди", - деди Трамп.
"Brexit сизнинг мамлакатингиз учун жуда маъқул иш бўлди, деб ҳисоблайман. Мана энди сизларнинг ўз юзингиз бўлади. Мамлакатни ўзингиз бошқарасиз, ҳал қилувчи қарорни ҳам бера оласиз. Юртни ҳам халқ истаган одамлар бошқаради" – деди британиялик журналистга мурожаат қилар экан Трамп.
Унинг бу баёноти Европада жуда катта резонанс берди. Чунки, Европа Иттифоқининг таназзули ҳақидаги гап-сўзлар ортиб бораётгани қитъа етакчиларини ташвишга солаётгани аниқ. Трампнинг баёнотига биринчи бўлиб расмий жавобни Франция президенти Франсуа Олланд берди. У бутун Европани АҚШ президентига қарши оёққа туришга чақирди.
“Америка раҳбарининг оғзидан Европа Иттифоқи тақдирига дахл қилувчи сўзлар чиқар экан, у қитъанинг бошқа мамлакатлари учун Brexitни намуна сифатида кўрсатар экан, биз унга жавоб беришимиз керак. Оқ уйнинг янги хўжайини билан муносабатларни қайта кўриб чиқиш жоиз. Европа Иттифоқи умумевропа манфаатларини ҳимоя қилган ҳолда мустаҳкам позициясини эгаллаши керак”, - деди Франсуа Олланд.
Трампнинг бу баёноти Олланд таъкидлаганидек ЕИ тақдирига дахл қилмай қўймайди. Агар бундай чиқишлар давом этаверса, Иттифоқ парчаланиб кетиши янада тезлашади. 

Биз Twitterда