Эшик қолиб "тешик"дан Ўзбекистонга олиб кирилган 607 миллион сўмлик телефонлар мусодара бўлди

 
Ўзбекистон ва Қирғизистон ўртасида алоқаларнинг кенгайгани, борди-келдининг осонлашганига қарамай, чегара пунктлари қолиб “айланма йўллар”ни танлайдиган “шоввозлар” ҳали ҳамон учрамоқда. Ия, сабаби нима чегара назорат пунктидан 5-10 дақиқада ўтса бўладиган пайтда, бунақа йўл қидиришнинг десангиз, жавоб оддий: Балои нафс!
Наманган вилоятида яшовчи Сайдамат Мелиев (Исми шарифини атайин ўзгартирдик, расмий нашрлардан ўрнак олиб эмас, яқинлари унинг нафси учун бировларнинг танқид нишонига айланмасин деб) қўшни Қирғизистондан ўзига ўхшаган танишларни орттирди. Бу ҳамтовоқлар уни жиноят кўчасига тортганда, айнан ўша нафсига қурбон бўлганлиги сабабли рози бўлди. Режа жуда “пухтадек” эди: Қирғизистондан Ўзбекистон ҳудудига ноқонуний йўллар билан, бож тўламасдан товар олиб кириш! Олдин ҳам бир неча бор чегарани ноқонуний равишда бузиб ўтиб юрган Мелиев, бу ишнинг қалтислигини англаган ва “инобатга олган” ҳолда, ўзи қолиб, икки вояга етмаган ўспиринни бу ишга ёллади. Йигитчалар Қирғизистонга айланма йўл билан ўтиб, отларга юкланган юкни ўтмишдаги карвондек тоғлар ора Ўзбекистонга олиб кираётганда уларни қарши олган чегарачилар бундай “буюк режа”нинг кутилмаган иштирокчиларига айланишди. Бундан саросимага тушган икки “шоввоз” юкларни ҳам ташлаб қочиб қолишди...
Қинғир ишнинг қийиғи чиқишига қирқ йил керак бўлмади. Ўтказилган суриштирувлар натижасида Сайдамат Мелиевнинг “тижорат плани” ўртага чиқди. Ўтказилган судда иштирок этган мухбирнинг айтишича, ўз айбига иқрорлигини билдирган Мелиев, тижоратни энди қонуний равишда қилишини айтиб, суддан енгиллик сўради. “Карвончи” йигитчалар ташлаб қочган юк – нақ 607 миллион 135 минг сўмлик телефонлар ҳамда газламалару, тамаки маҳсулотлари ашёвий далил сифатида суд ишига тиркалди. Тамаки маҳсулотлари йўқ қилинди, қолган асосий қисм давлат ҳисобига мусодара қилинди. Мелиевнинг ўзига 6 йил 6 ой озодликдан маҳрум қилиш жазоси белгиланди.
Мени нафсим балодир, қамоқларга солодур деяпти энди Мелиев...

Биз Twitterда