Foto: https://www.aiba.org/blog/aiba-names-new-interim-president/
Ўзбекистонлик таниқли бизнесмен ва жамоат арбоби Ғофур Раҳимов Халқаро Бокс Ассоциацияси (AIBA) президенти бўлди. Бугун Дубайда бўлиб ўтган AIBA Конгрессида Ғофур Раҳимов Халқаро Бокс Ассоциациясининг вақтинчалик президенти этиб сайланди. AIBAнинг президентлиги учун сайловлар 2018 йилнинг ноябрь ойида Москвада бўлиб ўтади ва унгача Раҳимов вақтинчалик президент вазифасини бажариб туради.
Бокс дунёсининг энг йирик вакилларидан бири бўлган Ғофур Раҳимовнинг AIBA президенти бўлиши аслида оламшумул янгилик эмас. Асос гап шундаки, АҚШ Молия вазирлиги 2017 декабрда Раҳимовни, собиқ иттифоқ фуқаролари – Юрий Пичугин, Рубен Татулян, Олимжон Тўхтахунов, Владимир Тюрин, Захарий Калашов, Василий Христофоров, Камчибек Колбаев, Лаша Шушанашвили, Владислав Леонтьевлар билан биргаликда сохта айбловлар билан, "жиноят оламининг пешволари, Евроосиё жиноий синдикати вакиллари" сифатида “қора рўйхат”га киритганди.
Ғофур Раҳимовнинг 65 ёшга тўлган кунида эълон қилинган, “Ўғрини ушла деб бақирган ўғрининг ўзи бўлади ёхуд АҚШнинг Ғофур Раҳимовга "наркобарон" ёрлиғини ёпиштиришдан манфаати нима?” деб номланган мақоламда шундай ёзгандим: “...Ўзбекистонда бокснинг ривожи, жаҳон миқёсида олдинги ўринлардан бирида боришимизнинг асосий омилларидан бири Ғофур Раҳимовнинг кўп йиллар давомида Ўзбекистон бокс федерациясини бошқаргани, Осиё бокс федерациясининг президенти, жаҳон ҳаваскор бокс ассоциациясининг вице-президенти сифатида фаолият юритгани эканини эътироф этмасдан илож йўқ. Айнан унинг спорт дунёсида таниқли шахс, кучли фигура эканидан фойдаланган ҳолда АҚШ махсус хизматлари уни “Афғонистон наркотик бизнесининг раҳнамоси” эканини 2000 йили эълон қилиб, ўша йили ўтказилган Сидней Олимпиадасига боришига тўсиқ қўйдилар. Бу эса бутун дунёнинг диққат марказида бўлган Олимпиада ўйинлари сабабли жуда кенг халқаро муҳокамага сабаб бўлди. 2010 йилда эса АҚШ молия вазирлиги Раҳимовга нисбатан Обаманинг махсус қарорига асосан санкция ҳам жорий қилганди...”
Энди кўрамиз, АҚШ Халқаро Бокс Ассоциациясининг президентига қандай муносабатда бўлади! “Бу кунингдан баттар бўл, АҚШ” дейдиган одам топилмаса керак!
