ББС журналистига: Ҳар нарса ёмонми Ўзбекистонда?

 
Ўзбекистондаги бўлаётган бугунги ўзгаришларга хорижда турволиб баҳо беришга уринаётган “қалами ўткирлар”ни кўриб ҳайрон қоласан инсон. Бор умрини нималарнидир эвазига “Ўзбекистонда ҳамма нарса ёмон, ўзбек ҳукуматининг қилган ҳар бир иши янглиш” дейиш билан ўтказаётган бундайларнинг кечқурун ётоққа кирганда виждони билан қандай муроса қилаётганини тасаввур қилиш қийин.
Йиллар давомида “Каримов ёмон, Каримов билан бу давлат ўзгармайди, у кетиши керак” деб аюҳаннос солиб келдилар. Биринчи Президентимизнинг вафотидан кейин, Шавкат Мирзиёев халқнинг тўла қўллаб-қувватлаши билан давлат раҳбари этиб сайлангани бироз буларни шошириб қўйди. Шунча йиллик “оғир меҳнатлари” ҳеч қандай “самара” бермаганини, халқ кўчаларга чиқиб, рангли инқилобни талаб қилмаганидан ўзларини йўқотиб қўйдилар.
Мирзиёев Президентлиги даврида бошланган ўзгаришлар ва ислоҳотлар ўз самарасини беришга бошлагани, ижтимоий ҳаётда ўзгаришлар воқеъ бўла бошлагани сабаб бир муддат жимжитликка чўмдилар. Аммо, бундай ҳаракатсизлик учун чойчақа берилмаслигини тушуниб етдилар чоғи, аста-секин хориж элнинг совуқ шабодаси эсиб турган хоналарида интернетдан топган ўзларига ўхшаганларнинг ёзган материалларига асосланиб бир нималар битишга бошладилар.
ББС Ўзбек хизмати “Озодлик” ва унга ўхшар нашрларга нисбатан бирозгина юқори туради. Йўқ, мақсад ва вазифа айни, ёндашув бироз профессионалроқ, нима қилганда ҳам, сиёсатни тижоратдан айирмасдан иш олиб борадиган машҳур медиа-холдингнинг бир бўлаги бўлгандан кейин бошқача бўлиши ҳам мумкин эмас.
Паҳлавон Содиқ исмли журналист бор бу нашрда. Асли ҳамюртимиз, Наманганда туғилган. Куни кеча ижтимоий тармоқдаги саҳифасида ёзган фикрларига кўзим тушиб қолди. Ўқидим-у, бунчалик беандишаликни қаерда ўргатишар экан деб ўйланиб қолдим. Мирзиёевни ўзи ҳақида фикр юритдилар бу хориждаги “ҳамкасабаларимиз”, ҳар бир айтган сўзини ўз фикри ожизлари етганича (кўп ҳолларда етмаганда ҳам) таҳлил қилдилар, энди у юритаётган сиёсатга бундай ҳурматсиз ҳолда тил текизишга ҳам ўтибдиларда, деган фикр ўтди.
“Ёшлар” телеканалига Озодбек Назарбековнинг раҳбар этиб тайинланиши ҳақида сўз юритган Паҳлавон Содиқ очиқдан очиқ Озодбек Назарбековни “пулдан, олди-бердидан бошқа мафкураси йўқ одам, ўзига ўхшаган мафкурасиз ёшлар тўдасини ортидан эргаштира оладиган машшоқ”қа чиқариб, давлатимиз раҳбарига таънаомуз шаклда “мессидж” беряпти “бу ишингиз батамом нотўғри, юритилаётган сиёсат хато” деб.
Ие, қачондан бери Паҳлавон Содиқлар кадрлар бўйича маслаҳат берадиган бўлиб қолди? Озодбек Назарбековга бундай ифтиролар билан муносабатнинг сабаби нимада? Нега эски клишелар қайтяпти хориждаги ўзбекча нашрларга, “ҳукуматнинг ҳар бир иши нотўғри деб ёзасиз, тўғри деб ўйласангиз биринчи жумлани қайта ўқиб олинг” деган эслатма нега уларнинг иш столлари устига қайтарилди?
Франция каби мамлакатда ўзининг онасидан катта аёл, мактабдаги ўқитувчиси билан билан турмуш йигит президент этиб сайланяпти, Ирландия, Люксембург бош вазирлари эркаклар билан бирга бўлишдан хурсандликларини, Сербиянинг янги бош вазири ўзининг лесбиянка эканини очиқ эътироф этяпти, бу давлатни бошқариб турган шахслар қайси мафкурани тарғиб қиляпти экан? Улар билан солиштирганда Озодбек Назарбеков авлиё-ку! Ё гап Назарбековда эмас, Ўзбекистон жамиятидаги ўзгаришларни қандай бўлмасин танқид қилишдами?!
Дилмурод Жумабоев

Биз Twitterда