Алишер Усмонов инвестиция киритганини тасдиқлади

Facebook акцияларига киритилган инвестициялар Алишер Усмоновга $1,4 млрд. фойда келтирди. Тадбиркор  Alibaba, Twitter ва Uberларга ҳам пул тиккан. Лекин бугунги кунда миллиардер табиий ресурс ва хом-ашё бизнесига асосий эътиборини қаратмоқда. У технологик компанияларга пул тикиш даври ўтганини, бу бозор аста-секин сусайишини маълум қилди.
 
 
Акциялар олди-сотдисидаги савдолари орқали маблағларини сўнгги йилларда сезиларли равишда оширишга эришган Усмоновнинг янги йилда қайси соҳага пул киритиши ҳақида гап-сўзлар тинмаётганди. Кўпчилик нашрлар унинг бу йили инвестицион сиёсатдан четда туришини башорат қилишганди. Лекин у тахминларни йўққа чиқариб ўзига фойда келтирадиган соҳага инвестиция киритганини тасдиқлади.
Усмонов ўз бойлигининг асосий қисмини шакллантирган соҳага яна қайтмоқда. У табиий ресурслар ишлаб чиқарувчиларига пул тикканини маълум қилди. Ушбу соҳа якунланган йилда катта ўсишга эришган. Аввалги уч йил мобайнида эса бу йўналишда бизнес қилиш ўта фойдасиз бўлиб, табиий ресурслар нархлари пастга тушиб кетганди. Бу ҳақда Bloomberg хабар бермоқда.
«Якунланган йил BHP Billiton, Fortescue каби хом-ашё компаниялари ва нефтегаз сектори компаниялари ҳам киритилган инвестициялар эвазига юқори даромад  таклиф эта олишини кўрсатди», - дейди Усмонов. Бизнесмен айнан шу соҳага инвестиция киритганини тасдиқлаган бўлсада, лекин  қайси компанияга пул тикканини ошкор этмади.
Усмонов айни пайтда $15,2 млрд. маблағ билан дунёнинг бадавлат инсонлари рўйхатида 66-ўринни эгаллаб турибди. Бизнесменнинг асосий активи «Металлоинвест»  холдингидир.
Facebook ва Alibaba Group Holding Ltd.ларга инвестиция киритиб, катта даромадга эга бўлган тадбиркор Twitter Inc. ва Apple Inc.ларга ҳам сармоя киритган.

Биз Twitterда