2017 йилнинг 1 июлидан эътиборан Қамчиқ довонидан юк машиналарининг ўтиши таъқиқланди

Қамчиқ довони орқали битта етакловчи ўққа 11,5 тоннадан ортиқ юк тўғри келадиган юк автомобиллари билан юк олиб ўтишни таъқиқланди. Ушбу таъқиқ 2017 йил 1 июлдан кучга киради.
Вазирлар Маҳкамаси томонидан 2017 йил 11 апрелда қабул қилинган «А-373 автомобиль йўлининг Қамчиқ довонидан ўтувчи қисмидан самарали фойдаланиш чора-тадбирлари тўғрисида»ги қарор шуни кўзда тутади.  
«Чинор» (Тошкент вилояти Оҳангарон тумани) ва «Шеробод» (Наманган вилояти Поп тумани) постларида автотранспорт воситаларининг оғирлик ва габарит ўлчамларини, шу жумладан, етакловчи ўқ юкламаларини текшириш бўйича замонавий ускуналар ўрнатилади.
Ҳужжатга мувофиқ, битта етакловчи ўққа тушадиган оғирлик параметрлари бўлинмайдиган катта габаритли ва оғир юкларни ваколатли органларнинг махсус рухсатлари билан олиб ўтаётган, шунингдек, Қамчиқ довонида йўл-транспорт инфратузилмаси объектларини қуриш, реконструкция қилиш, таъмирлаш бўйича ишларни амалга ошириш учун жалб қилинган юк автотранспорт воситалари учун амал қилмайди.

Биз Twitterда