Россияга қарши ахборот хуружига бизни тортишмоқчи! Гордон деган ғаламис орқали!

 
Интернет ахборот маконида сўнгги кунларда Россия Давлат Думаси депутати Евгений Федоров билан интервьюдан иқтибос сифатида сарлавҳага чиқарилган “Наша цель – восстановление исторических границ русского государства по состоянию на 1945 год” (Мақсадимиз – Рус давлатининг 1945 йил ҳолатига чегараларини тиклаш”) деб номланган материал, бундан фойдаланган ҳолда тайёрланган “Депутат Госдумы: Наша цель — захват всех республик бывшего СССР” (Давлат Думаси депутати: Мақсадимиз – собиқ иттифоқ республикаларини босиб олиш”) шаклидаги қатор материаллар юз кўрсатмоқда.
Материал Россия Давлат Думаси депутати Евгений Федоров билан украиналик журналист Дмитрий Гордоннинг суҳбати шаклида берилмоқда. Материалга ҳаттоки YouTube каналидан  суҳбатнинг видеокўриниши ҳам илова қилинган, аслида эса бу ҳаволага ўтишга уринсангиз, бундай видео мавжуд эмаслигини кўрасиз.
Интервьюда  Россия Давлат Думаси депутати Евгений Федоров “собиқ иттифоқнинг ҳудуди халқаро ҳуқуққа кўра, бизнинг ҳудудимиз. Биз бу ҳудудни ўзимизга қайтаришимиз керак” деган фикрни билдиргани ўртага ташланади.
Бундай “тўқима”га баҳо беришдан олдин ким аслида ким деган саволга жавоб олайлик:
 
 
Дмитрий Гордон – “Евромайдан” туфайли ўртага чиққан, аввалдан ўртамиёна журналист. Украиналик ҳамкасбларининг эътирофига кўра, фирибгар, бўҳтончи, унинг аввал кўча фолбинлари тўдабошиси бўлгани ҳам айтилади. У ёритаётган сайтнинг асосий муаллифларидан бири россиялик яна бир АҚШ ювиндиси билан кун кўрувчи Виктор Шендерович эканлиги эса, унинг фаолияти векторини аниқ кўрсатиб беради.
Евгений Федоров эса Россия Давлат Думаси депутати, Россия президенти Владимир Путиннинг амалдаги маслаҳатчиси, ўзининг АҚШга қарши кескин фикрлари билан ажралиб турувчи сиёсатчи.
 
 
Тўрт чақириқдан бери Парламент депутати. Буни ҳаттоки ўша “машҳур” интервьюнинг тагида ҳам шундай кўпириб таъкидлашганки, “кўряпсизларми, бу оддий одамнинг эмас, Россиянинг йирик сиёсатчисининг фикри” деган ғояни тиқишга уринишмоқда, ўз материалларига эътибор торттиришмоқда.
Энди, ўйлаб кўринг, шу мақомдаги бир сиёсатчи бугунги Россия ичида бўлган ҳолатда бу гапни бу контекстда гапирадими? Чунки бундай баёнот Россия учун биринчи навбатда ўта зарарли экани равшан.
Бундай "сенсация"дан мақсад аниқ: Россиянинг Мустақил Давлатлар Ҳамдўстлиги мамлакатлари билан алоқаларининг яхшиланиши, бу мамлакатларни ҳам ўз ичига олган Шанхай Ҳамкорлик Ташкилотининг кучайиши кўпларнинг пайтавасига қурт туширган кўринади. Энди ахборот хуружлари орқали бу алоқаларни бузишга уринишмоқда. Қўлларидан келмайди!
Дилмурод Жумабоев

Биз Twitterда