"Озодлик"нинг ўзбек бюроси яқинда ёпилади...

ФОТО: http://press-post.net/
 
“Озодлик”да Намангандан шундай “ажойибот” хабарлари бериладики ҳайрон қолади киши, наҳот шу нарса Ўзбекистонда, Наманганда рўй берса деб. “Озодлик”ка бир нарсани айтиб қўйишни лозим топдим, ҳар нима қилганда ҳам “ҳамкасабаларимиз”: наманганлик “хабарчи”ларининг сизни лақмалигингиздан фойдаланиб, хонада ўтириб олиб тўқиган материаллари билан “эксклюзив” материаллар жўнатишяптики, ўқиган улардан кўра кўпроқ Сизга куляпти. Рус ёзувчиси Лейкиннинг шундай ибораси бор: “Ёлғонни тўқиганда ҳам бироз мантиқли тўқинглар, бу сизларники қуруқ сафсатадан иборат”. Ўзи “Озодлик”ни биров хабар манбаси ҳисобламайди, бунақа материаллар билан эса, кимлигингизни билмайдиганнинг ҳам энсаси қотади. Эртага сизни ёпиб қўйса хўжайинларингиз, бир тийинлик сенлардан фойда йўқ деб, журналист бўҳтон фантазиясини кимдан ўрганамиз, бизда олийгоҳларда бу мавзу умуман ўтилмайди...
Наманганнинг Тўрақўрғон туманидаги “Порлоқ” қишлоғи фуқаролари газ қувурларини кесгани келган газ идораси ходимларини қувиб солган эмиш... Нимаймиш, ҳоким айтганмиш, қишлоққа газ берилмайди деб, шунинг учун кесишни буюрилганмиш... Бутун қишлоқ кўчага чиққан эмиш, ундан кейин газчилар ишни тўхтатишга мажбур бўлганмиш... Уёғи бир бирига уланмаган иборалар: Қишлоқда газ таъминоти чатоқмиш, аммо баъзилар газдан фойдаланармиш, ипак қурти боқаётганлар уйларини газдан иситармиш, аммо ҳокимият бу газни кесишни буюрганмиш... Очиғи, бошқа бир нарсани ёзса ишонар балки Ўзбекистонни кўрмаган ўқувчи-ю, бугун Ўзбекистонда аҳолини газ билан таъминлашда муаммоларни бартараф этишнинг чораларини ахтараётган ҳукумат ҳаттоки хусусий бизнесни ҳам газ операторлигига жалб этиб турган бир пайтда бунақа материал билан кимни ишонтирмоқчи бу масхарабозлар, тушунмайсан... Тафслотларни қаранг, “50 дан (бошқа ўринда – “барча инсонлар”(!) ) ортиқ киши, эркак, аёл, қизлар (бу ўспиринлар нега бу рўйхатга киритилмаган, узунроқ чиқарди)...
Хўп, бир гап: Ўзбекистонда, Наманганда бўлмаганларга, ҳаёт тарзини тушунмаганларга тушунтирсак, бу ҳокимият бўладими, тумангазми, электр тармоқларими, маҳалла ҳудудига ким келса аввал маҳалла қўмитасига келади, ўзини таништиради, мақсадини тушунтиради. Маҳалла раиси, маҳалла фаоллари мантиғига мос келган нарса маҳаллага жорий қилинади, йўқса йўқ. Энди, гапни қаранг, буйруқни ҳоким берганмиш, Узтрансгаз билан келишилганмиш, лекин маҳалла котибининг бундан хабари йўқмиш, чиқиб газчилар билан сўкишганмиш... Қолаверса, газ қувурини газ идораси ходими кесмайди...
 Вилоят ҳокими қишлоқда газнинг қувурини кесиб ташла деган буйруқ берадими? Ахир газ бўйича вилоят, туман “Газтаъминот” идоралари бор. Уларнинг ишику бу ахир... Ҳудудлардаги газ қувурларининг эксплутацияси, уларнинг яроқлигини текшириш, лозим бўлганда алмаштириш бу идоранинг иши. Ва Тўрақўрғон туманида ҳам айнан трубаларни алмаштириш ишлари олиб борилгани факт. Қишки мавсум якунлангач, режа бўйича ҳар бир туманда ҳудудма-ҳудуд шундай ишлар олиб борилади ва борилмоқда. Бу фақат газга эмас, сув қувурларига ҳам тааллуқли. Эртага “Озодлик” ёзсин, Наманган ҳокими сув қувурларини кесиб ташлаб, аҳолини водовозда сув билан таъминлашга буйруқ берди деб. Ёки канализация тизимида ҳам иш олиб бориляпти таъмирлаш-текшириш бўйича. Агар “Озодлик” Наманган канализация тизимларининг ичига ўз мухбирини жўнатса, балки у ерда ҳам, аҳолини “қийнаётган муаммолар” топилар!?
“Мақола” шунақа бемаза ёзилганки, якунида Одам Ато давридан бери Ўзбекистон ҳудудида “мавжуд бўлган”, очиқроғи, “Озодлик” “олтин фонди”да сақланаётган эски материаллардаги “муаммолар” санаб ўтилган. Илгари “Озодлик” ёзган нарсаларнинг “подача”си сал қизиқроқ бўларди, мазмун-моҳият бугунгидай қуруқ иддаолардан иборат бўлса ҳам... Башоратчи эмасман-у, бундай ишлашда давом этса, мутасаддилари томонидан “Озодлик”нинг ўзбек бюроси яқинда ёпилади... Яна кўрамиз!
Дилмурод Жумабоев

Биз Twitterда