Россиянинг Свердловск областида эски ташландиқ кон атрофида айланиб юрган икки ўсмирдан бири эҳтиётсизлик оқибатида конга тушиб кетди. Лекин, пешонасига ўлим ёзилмаган экан, тирик қолди. Бу ҳақда Russia Today хабар қилди.
Алапаевск шаҳарчаси атрофида рўй берган бу воқеа тафсилотлари қуйидагича: 80 метр чуқурликдаги конга тушиб кетган йигитча 15 метрларча, беш қаватли уй баландлигига тенг масофада пастга шўнғигандан кейин, конга олиб келиб ташланган ахлатлар уюмига илиниб қолган. Эътиборлиси, ахлат уюми ҳам кон четига бир амаллаб ёпишиб қолган бўлиб, исталган сонияда ўсмир билан бирга тубга тушиб кетиши мумкин эди. Ташқарида қолган шериги томонидан зудлик билан чақирилган Фавқулодда хизматлар вакиллари йигитчани чуқурликдан олиб чиқишди.
