Россияда пойтахт Москвадан Сибирга кўчадими?

 
Россиядаги Демография, миграция ва минтақавий тараққиёт институти кузатув кенгаши раиси Юрий Крупнов мамлакат президенти Владимир Путинга пойтахтни Москвадан Урал тоғи ортига кўчириш таклифи билан чиқди. Бу ҳақда РИА ахборот агентлиги хабар қилади.
Крупновнинг фикрича, “Россия “ўта марказлашган”, пойтахт ва унинг атрофидаги минтақада мамлакат аҳолисининг бешдан бир қисми истиқомат қилади. Қолаверса, 15-25 йирик шаҳардаги яшовчилар умумий аҳолининг ярмидан кўпини ташкил этади.”
Ўз ташаббусини “Москваликлаштиришдан узоқлаштириш доктринаси” деб атаган муаллиф, уни Владимир Путинга юбориб улгургани маълум бўлди.
Россия ички миграция натижасида ўзининг геосиёсий устунлигини йўқотаётганини эътироф этган Крупнов, асосий эътиборни Сибир ва Узоқ Шарқни ривожлантиришга қаратиш кераклигини таъкидлаган.
“Тор зоналарга тиқилиб яшаш натижасида рус халқи ҳаётга бўлган қизиқишини йўқотмоқда, оиласи аъзолари сони кўпайишини истамаяпти, ёлғиз кексаликка дучор бўляпти... Дунёнинг 1/7 қисмида жойлашган Россияда ҳаёт тарзи айтайлик, инглизларга ёки немисларга қараганда 7-10 марта зерикарли, тиқилинч ва кўп қаватли уйларда ўтяпти..” дейилади лойиҳада.
Бу масаланинг ечимини Крупнов пойтахтни Москвадан Урал тоғи ортига кўчиришда деб билади.

Биз Twitterда