Кун тартибида яна Форс кўрфази: Баҳрайн, Саудия Арабистони, Миср ва БАА Қатар билан дипломатик алоқаларни узди!

ФОТО: https://www.visitqatar.qa
 
Душанба куни Баҳрайн, Саудия Арабистони, Миср ва Бирлашган Араб Амирликлари бирин-кетин Қатар билан дипломатик алоқаларни узишгани ҳақида баёнот беришди.
Дастлаб Баҳрайн ўз ички сиёсатига аралашаётгани учун Қатар билан алоқаларни тўхтатганини маълум қилди. Қатарлик дипломатларга мамлакатни тарк этиш учун 48 соат, қолган қатарликларга 14 кун муҳлат берилди. Баҳрайн қуруқликда, денгизда ва ҳавода Қатар транспорт воситалари учун барча киришларни беркитди. Шунингдек, расмий Манама Қатарни Баҳрайн хавфсизлигига таҳдид қилаётган террорчи гуруҳларни молиявий қўллаб-қувватлаётганликда айблаб, бу халқаро сиёсат нормаларига зид эканини таъкидлади.
Худди шундай айбловлар билан Саудия Арабистони, Миср ва Бирлашган Араб Амирликлари ҳам Қатар билан дипломатик алоқаларни узишди.
Энди буёғига бўладиганлар қандай сценарий асосида рўй беради, шуниси қизиқ. Чунки Қатар Форс кўрфазида АҚШнинг энг асосий ҳамкорларидан бири ҳисобланади. Мамлакатда 10 мингдан зиёд АҚШ аскарлари жойлашган Америка ҳарбий базаси мавжуд. 1 миллиард доллардан ортиқ маблағ эвазига қурилган Ал-Удейд ҳарбий аэродроми уларнинг ихтиёрида. Бу аэродром яқинида АҚШ Қуролли Кучлари Марказий қўмондонлиги штаб квартираси жойлашган...Қолаверса, Қатарни террорчиликни қўллаб-қувватлашда айблаш билан АҚШга ҳам тош отилмоқда, чунки Америка давлат департаментининг халқаро терроризм ҳақидаги ҳисоботида “Америка Қўшма Штатлари ва Қатар террорчиликка қарши курашда мустаҳкам ҳамкорлик ичида” экани таъкидланган.
Иккинчи томондан, Саудия Арабистони АҚШнинг бошқа бир шерикларидан бири ҳисобланади. Арабистон Американинг нефт борасида дунё сиёсатини белгилашида асосий ричаг вазифасини ўтайди. Қолаверса, АҚШ-Араб давлатлари мулоқотида Арабистон доимий равишда АҚШ манфаатларини Араб давлатлари томонидан қўллаб-қувватланишини таъминлаб келган.
Энди, кўрамиз, Қатар ва бошқа Араб давлатлари ўртасида алоқалар қайта тикланадими, ёки АҚШ ўз манфаатига кўпроқ хизмат қиладиган тарафни танлаб, иккинчи тарафни ўз қаршисига оладими?
Дилмурод Жумабоев

Биз Twitterда