Ҳам ҳаводан, ҳам ердан - Сурияга кирган Турк аскарлари икки кунда 9 та қишлоқни террорчидан тозалади

 
АҚШ ҳукуматининг, Суриянинг Туркия билан чегарадош Африн минтақасида террорчи гуруҳларни бирлаштиришни мақсад қилган 30 минг кишилик “Сурия чегара хавфсизлиги кучлари”ни ташкил этиш режаси барбод бўлди. Шанба куни Туркия Қуролли Кучлари томонидан бошланган “Зайтун шохи” деб номланган ҳарбий операцияда турк аскарлари ҳам ҳаводан, ҳам ердан ўз чегараларидаги террорчиларни йўқ қилишга муваффақият билан давом этишмоқда.
20 январь куни Туркия соати билан 17:00 да Африндаги террорчилар манзилларига F-16 самолётларининг бомба ёғдириши билан бошлаган ҳарбий ҳаракатлар натижасида илк 1,5 соатда 108 террорчи масканлари аниқ нишонга олинди. Икки ярим соат ўтгач, янада йирик зафар қайд этилди: АҚШ томонидан террорчиларга қурол-яроғ етказиб бериш учун фойдаланиб келинган Минниғ аэропорти йўқ қилинди. Якшанба куни эса, қуруқлик кучлари ҳудудга кирди. 3 соат сўнгра, илк қишлоқ, Шенгел террорчилардан тозалангани маълум қилинди. Кечга яқин эса, Турк аскарлари 5 километр ичкарига кириб боришгани, террорчилар йўқ қилинган қишлоқлар сони 9 тага етгани аниқ бўлди.
Туркиянинг ўз тупроқлари хавфсизлигини таъминлашга қаратилган ҳарбий операцияси дунёнинг кўплаб мамлакатларида қўллаб-қувватланмоқда. Лекин энг ачинарлиси, 2016 йил июлда Туркияда давлат тўнтариши қилишга уринган террорчи ФЕТЎ ташкилотининг баъзи мамлакатлар пинжига кириб олиб, жон сақлаётган “қолдиқлари”, бу масалада Суриядаги террорчи гуруҳлар томонида эканидир. Улар турли майда-чуйда ОАВлар орқали, Туркия ҳукуматининг бу қарорини нотўғри эканини таъкидлашга чираниб, ҳудудий яхлитликни сақлашга қаратилган ҳаракатни, ирқчилик ва миллатчилик уруши деган ном билан аташга уринишмоқда.

Биз Twitterда