Жанубий Қозоғистон вилоятининг Лесхоз аҳоли пункти яқинида, Арис шаҳри теварагида бир ойдан бери қазиш ишлари олиб борилмлоқда. Эр-хотин Смана Отеген ва Гулжанар Алтинбекларнинг сўзларига қараганда, айнан шу жойда буюк саркарда Чингизхон абадий қўним топган, деб ёзади Zamana.kz.
"Тушимга тўртинчи авлодда мен билан боғланувчи бобом Манас кирди. У мени ким биландир таништириб қўйишини, фақат бунинг учун аввал қурбонлик қилишим лозимлигини уқтирди. Кейинги кун биз қўй сўйдик. Икки кундан кейин бобом тушимга такрор кириб, менга бир инсонни олиб келди. Билсам у Чингизхон экан», - деди Гулжанар Алтинбек.
Аёлнинг сўзларига кўра, бир неча кундан кейин тушига Чингизхоннинг ўзи кирган. «У менга сўзларига қулоқ солиб Жанубий Қозоғистонга боришимни, Арис шаҳрига етганимда, жанубга бурилишимни айтди», - ҳикоя қилади Гулжанар.
Эр-хотиннинг айтишларича, олиб борилган қазиш ишларидан сўнг айни пайтда Чингизхоннинг қабрига қадар 30 сантиметр қолган. Лекин қазиш ишларини давом эттириш мумкин эмас. Чингизхон унинг қабрини очилиши учун Нурсултон Назарбоевнинг рухсатини кутмоқда. Смана билан Гулжанарнинг айтишича, агар қабр очилса, мамлакатда ижобий ўзгаришлар юз бериб, коррупция, хиёнат ва ёлғон йўқолиб кетади.
"Чингизхон менга айнан шу жойда мангу уйқуга кетганини айтди. "Мени ерга олиб чиқинглар. Мен мўғул эмасман, Қиёт уруғиданман. Ота-онам қозоқдир, хотиним эса қўнғирот уруғидан". Шундай деди у, - дейди Гулжанар.
Уларнинг сўзларига кўра, Назарбоев яқин орада бу ерга келади. Келгусида бу ерда мақбара ва музей барпо этилади. Меҳмонхоналар қурилади.
