Олти ой президентсиз қолган Австриянинг янги раҳбари қасамёд қилди

Article
Бугун Австриянинг сайланган президенти Александер Ван дер Беллен мамлакат парламенти вакиллари иштирокида юртни ҳалол ва адолат билан бошқаришни таъкидлаган ҳолда қасамёд қилди. 73 ёшли Ван дер Беллен Австриянинг иккинчи жаҳон урушидан кейинги тўққизинчи президенти бўлди. У ўтган йилнинг июль ойида ваколати тугаган Хайнц Фишер ўрнини эгаллади.
Сайлов жараёнларининг чўзилиб кетиши натижасида мамлакат 6 ой раҳбарсиз қолганди. Ниҳоят бунга 2016 йилнинг 4 декабрида чек қўйилди. Қайта сайловлар натижасига кўра 53,8% овоз олган мустақил номзод, "Яшиллар" партиясининг собиқ етакчиси Александер Ван дер Беллен ғалаба қозонди. Австрия озодлик партияси етакчиси Норберт Хофер эса 46,2% овоз билан мағлубиятни тан олди.
Парламент республикаси ҳисобланган Австрияда президент ваколатлари ўта чекланган бўлиб, у давлатни халқаро майдондаги вакили сифатида иш олиб бориши мумкин холос. Сайлов натижаларига кўра федерал канцлерни, шунингдек, вазирларни лавозимига тасдиқлайди. Лекин қонунчилик фаолияти ва ҳукумат ишига таъсир ўтказа олмайди. 

Биз Twitterда