Унга кўра 80 та давлат фуқаролари Беларусга “Минск” миллий аэропортидаги Давлат чегара назорат пунктидан визасиз киришлари мумкин. Уларга беш кун давомида мамлакатда бўлишлари учун рухсат берилади. Қарор бугундан эътиборан кучга кирди, деб хабар беради ТАСС.
Айнан шу қарор натижасида Беларусдан Россияга исталмаган шахсларнинг ўтишини олдини олиш мақсадида Москва икки давлат ўртасидаги чегара назорат пунктларида ҳушёрлик чораларини кучайтириш ишларини бошлаганди. Буни нотўғри қабул қилган иттифоқдош республика раҳбари Александр Лукашенко Россияни ўзаро келишувларга амал қилмаётганликда айблаб, муносабатларни бироз таранглашига замин яратганди.
Кремль эса чегарадаги назоратни кучайтирилиши билан боғлиқ чоралар Россияга ноқонуний йўллар билан турли оқим вакиллари, террорчи ва қўпорувчилар ўтишига қарши қаратилгани, бу ҳаракатлар қардош ўлка фуқароларига нисбатан эмаслиги ҳақида расмий баёнот берган.
Янги режимга кўра, чегарадан ўтувчилар паспорт ва тиббий суғурта полисини кўрсатсалар бўлгани. Бу жараёнда уларнинг ҳужжатларига кириш ва чиқишда махсус қайд киритилиб оддий расмиятчилик амалга оширилади холос.
Ўтган йили “Минск” аэропорти 3 млн. йўловчини қабул қилган. Қабул имкониятлари эса 5,8 млн.ни ташкил этади. Янгилик туфайли сайёҳлар оқими 20 фоизга ошиши кутилмоқда.
