Баҳодир Жалолов ва Санжар Турсунов ҳам Токио-2020 йўлланмасини қўлга киритди, Фанат Қаҳрамонов эса имкониятни сақлаб қолди ​

Иорданияда бокс бўйича Осиё/Океания минтақалари учун Токио-2020 йўлидаги лицензион турнир давом этади. Кеча энг оғир вазн тоифасида ҳамюртимиз Баҳодир Жалолов (+91 кг) чорак финал жангини ўтказди.
 
 
Ушбу баҳс ғолибга ярим финал қатори Токио-2020 йўлланмасини ҳам тақдим қилиши билан янада аҳамиятли эди. Баҳрайнлик Данис Латиповга қарши рингга кўтарилган Жалолов жангда тўлиқ устунлигини намойиш қилди ва ишончли ғалабани ўз ҳисобига ёзиб қўйди.
Бундан аввал -91 килограмм вазн тоифасида ҳамюртимиз Санжар Турсунов чорак финал жангини ўтказганди. Эронлик Туфан Шарифи билан кечган баҳсда боксчимиз тўлиқ устунлик қилди ва ярим финал йўлланмасига эга чиққанди.
 
 
Мусобақа регламентига кўра -91 килограмм вазн тоифасида ушбу мусобақада Токио-2020 учун 4 та квота ўйналмоқда. Демак, ярим финал йўлланмаси сурхондарёлик боксчимизга Олимпиадада қатнашиш ҳуқуқини беради.
Яна бир чорак финал баҳсида ҳамюртимиз Фанат Қаҳрамонов қозоғистонлик Абилхан Аманқулга қарши рингга кўтарилди. Афсуски, беллашувда қозоғистонлик боксчининг қўли баланд келди ва ярим финал йўлланмасини қўлга киритди.
 
 
Регламентга кўра, ушбу вазн тоифасида Токио-2020 учун 5 та квота ажратилган. Юртдошимиз энди чорак финалда имкониятни бой берган бошқа боксчилар билан ягона йўлланма учун кураш олиб боради.
Шу тариқа делегациямизнинг Токио-2020 Олимпия ўйинлари учун қўлга киритган умумий йўлланмалари ўн еттитага етди. 

Биз Twitterда