Икки кун аввал сайтимизда Сурия терма жамоаси ҳужумчиси билан эксклюзив суҳбат эълон қилган эдик. Араб футболчиси жамоасининг ўйинга руҳий тайёргарлигини жуда юқори баҳолаганди. Афсуски, бу суҳбатни Самвел Бабаян ўқимаган кўринади, акс ҳолда жамоани руҳан тайёрлашга кўпроқ эътибор берган бўларди.
Сурия-Ўзбекистон ўйинининг тафсилотини сатрларга тўкишнинг кераги йўқ. Мухлислар телевизор қаршисида икки соат асаббузарлик ҳолатини бошдан кечириб бўлишди. Малайзиягача яхши умид билан етиб борган футбол ишқибозларига Худо сабр берсин.
Очиғи, бу футбол эмас! Бу майдонда мавжуд бўлиш холос. Бундай ўйин билан Жаҳон чемпионатига музқаймоқ егани боргандан, ўша музқаймоқни Тошкентда истеъмол қилган яхши.
Ғалабаларнинг отаси кўп бўлади, мағлубият эса доим етим, деган ибора бор. Бизнингча, бу мағлубиятимиз етим эмас, Бабаяннинг зурриёди бу. Сабаби, майдонда иштиёқни кўрмадик, интилишни кўрмадик, ишончни кўрмадик. Агар булар мавжуд бўлиб, куч етмаганда, техника етмаганда эди, футболчиларга гап гапирса бўларди. Аммо...
Гапнинг пўскалласи, Хитойдан хаёл этиб бўлмайдиган армуғон келиб турган пайтда, Суриядан енгилсак, унда бу – Самвел Вячеславович ҳолатни тўғри баҳолаб, ўзига реал баҳо бериб, кўч-кўронини терма жамоадан йиғиштириши керак дегани. Буёғига Бабаян билан юрмайди. Қатар ўйинини янги ҳаво билан бошлаш керак, агар Россиядаги жаҳон чемпионати ҳам биз учун бировларнинг ўйинини томоша қиладиган турнирга айланиб қолишини истамасак!
Дилмурод Жумабоев
