УЕФА 2015/16 мавсум йили учун молиявий ҳисоботларни эълон қилди. Бу ҳақда ТАСС хабар қилади.
Ташкилот томонидан ҳар бир миллий чемпионатда тўп сураётган футболчиларнинг умумий нархи қўшиб чиқилганда, Англия премьер-лигаси бу борада тенгсиз эканлиги аниқ бўлди. Туманли Альбионда тўп сураётган футболчиларнинг қиймати 4,4 миллиард еврони ташкил этган. Ундан кейинги поғоналарни Испания (3,25 млрд), Италия (2,575 млрд), Германия (2,38 млрд), Франция (1,56 млрд) ва Туркия (947 млн) чемпионатлари эгаллашган. Россия премьер-лигаси эса 895 млн. евро билан еттинчи поғонани банд этди. Саккизинчи ўриндан эса Бразилия (867 млн), 16-дан Хитой (354 млн) жой олди.
"Европа лигаларида жаҳоннинг энг иқтидорли футболчилари (82%) тўп суришади. Уларнинг 48 фоизидан ошиғи Англия, Германия, Италия ва Испанияда ўйнашади", - дейилади ҳисоботда. Шунингдек, нархлар футболчиларнинг бозор баҳосида ҳисобланган бўлиб, ҳақиқат билан бироз фарқ қилиши мумкинлиги ҳам таъкидланган.
Шунингдек, УЕФА ҳисоботидан футболчиларнинг ўртача ёши кўрсаткичлари қайд этилган банд ҳам мавжуд. Унга кўра Россия премьер-лигаси (РФПЛ) ва Туркия Суперлигасида Европанинг энг ёши улуғ футболчилари тўп суришади. Ушбу чемпионатларда тўп сурувчи чарм тўп усталарининг ўртача ёши 27,1 ёшни ташкил этади. Кейинги ўринлардан Англия, Испания ва Италия чемпионатлари (26,9) ўрин олишган. Франция (26,0) ва Германия (25,4) лигалари эса янада "ёшроқ". Европанинг энг ёш лигаси сифатида эса Голландия дивизиони қайд этилди. (23,1)
