Жума куни Ўзбекистон Республикаси Олий Мажлиси Қонунчилик палатасининг навбатдаги мажлиси бўлиб ўтди. Депутатлар унда бир қатор қонунлар билан бирга Ўзбекистон Республикаси Конституциясига ўзгартиш ва қўшимчаларни муҳокама қилишган. Маълумотига кўра, Конституциянинг 80-, 81-, 83-, 93-, 107-, 110-, 111-, 112-моддаларига ўзгартиш ва қўшимчалар киритилиши кутилмоқда.
Ўзбекистон Республикаси Олий Мажлиси Қонунчилик палатасининг ахборот хизмати хабарига кўра, мажлиснинг кун тартибига киритилган масалалар сиёсий партиялар фракциялари ва Ўзбекистон Экологик ҳаракати депутатлар гуруҳининг, Қонунчилик палатаси қўмиталарининг мажлисларида вазирликлар ва идоралар, фуқаролик жамияти институтларининг вакиллари иштирокида дастлабки тарзда ҳар томонлама ўрганиб чиқилган эди. Парламент аъзолари суд тизими бенуқсон ишлаши кераклигини таъкидлашган.
«Ўзбекистон Республикаси Конституциясига, «Судлар тўғрисида»ги Қонунга ва бир қатор процессуал кодексларга киритилаётган, янгидан ташкил этилаётган маъмурий ва иқтисодий судларнинг тегишли ҳуқуқий базасини яратиши, шу билан бирга қабул қилинган суд ҳужжатларини қайта кўриб чиқишга доир бир-бирини такрорловчи инстанцияларни чиқариб ташлаган ҳолда ишларни кўриб чиқиш тиртибини соддалаштириши лозим бўлган ўзгартиш ва қўшимчалар айнан шунга қаратилган», дейилади хабарда.
