Тожикистонга қилдик сафар: Дўсти-қадрдон азалдан Поп билан Аштнинг халқи!

 
Ўзбекистон президенти Шавкат Мирзиёев ва Тожикистон президенти, Миллат пешвоси Имомали Раҳмоннинг саъй-ҳаракатлари натижасида икки дўст мамлакат муносабатларидаги қайта жонланиш, сўнгги йиллар мобайнида бир-бирига ҳасрат қолган ўзбек ва тожик халқлари ўртасида борди-келдини, ҳамкорликни кучайтирди.
Икки мамлакат ўртасида чегараларнинг қайта очилиши, эркин ўтишнинг қайта йўлга қўйилиши, айниқса Ўзбекистон ва Тожикистоннинг бир-бирига қўшни бўлган вилоятлари, туманлари учун катта аҳамият касб этди. Давлат раҳбарларининг ташаббуслари билан ўртадаги кераксиз тўсиқларнинг олиб ташланиши бу ҳудудлар аҳолиси томонидан катта миннатдорчилик билан кутиб олинди. Аҳоли ўртасидаги бундай яқинликни қўллаб-қувватлаш, ҳамкорликни янада янги босқичга кўтариш эса чегарадош туман ва вилоятлар раҳбарлари учун аҳамиятли вазифага айланди.
Наманган вилоятининг Поп тумани ҳамда Тожикистондаги Сўғд вилоятининг Ашт тумани раҳбарлари ҳам бу икки давлат ўртасидаги яқиндашув ва дўстлик кўприкларининг қайта тикланиши борасида катта ишларни йўлга қўйдилар. Икки туман ўртасида жорий йилнинг март ойида қайта очилган чегара ўтказиш пункти эса, самарали ҳамкорликни кучайтириш учун имкониятларни янада юқори босқичга олиб чиқди.
 2018 йил 2 июнь куни Поп тумани ҳокими Азамжон Султонов бошчилигидаги, туман идоралари раҳбарлари, тадбиркорлари ҳамда фермерларидан иборат делегация Ашт туманига дўстлик ташрифини амалга оширди.
Делегацияни чегарадаги «Поп» ўтказиш пунктида Ашт тумани ҳокимияти раиси Мирдадо Зариф Мирмуҳаммади ва туман идоралари раҳбарлари кутиб олдилар. Икки туман раҳбарининг бир-бирларига қадрдонларча қучоқ очишганини кўриб, бу ташрифнинг туманлар аҳолиси учун аҳамияти катта эканини англайсиз...
Ашт тумани майдони 2,785 минг километр квадрат бўлиб, бизнинг Поп билан деярли тенг. Аҳолиси 170 минг киши. Ўзбеклар 40 фоиздан кўпроғини ташкил қилади. Шуниси эътиборга моликки, Аштда ўзингизни худди Ўзбекистонда юргандай ҳис этасиз. Маҳаллий тожик аҳоли ҳам ўзбек тилини ҳеч бўлмаганда тушунади, ўз фикрини ўзбекча ифодалай олади.
Туманда қишлоқ хўжалиги, хусусан боғдорчилик ҳамда пахтачилик соҳалари, чорвачилик тармоғи кенг ривожланган. Ашт ўзининг машҳур ўриклари ҳамда Марказий Осиёда энг сифатли ҳисобланган тузи билан машҳурдир. Сангтарошлик, гранит ишлаб чиқариш ҳам Аштнинг кўзга кўринган тармоқларидан биридир.
 
Қишлоқ хўжалиги – тажриба ва фикрлар алмашинувидан фақат фойда бор
Ташриф тумандаги хусусий пахта тозалаш заводидан бошланди. Маҳаллий тадбиркор томонидан йўлга қўйилган бу завод, тумандаги деҳқончилик хўжаликларидан пахтани сотиб олиб, қайта ишлайди ва экспортга йўналтиради. Шу билан бирга, заводнинг ўзига қарашли 1500 гектар дала ҳам мавжуд бўлиб, ўз қайта ишлайдиган пахтанинг бир қисми ўша ерда етиштирилади.
 
 
Кейин, пахта даласига йўл олдик. Пахталар биздан сал кечикиш экилиши билан диққатни тортди. Поплик фермерлар ҳамда Аштлик деҳқонлар пахта етиштиришдаги ўз услублари борасида фикр алмашдилар.
 
 
Аштга келиб, боғларни кўрмай кетиб бўладими?! Ҳар ён ўрикзор, гилосзор, шафтолизор... Дарахтларда пишиб ётган сархил мевалардан узиб келишди, таъми ажойиб! Ҳақиқатдан ҳам ҳавоси бир, инсонининг табиатга муносабати бир бўлган қўшни икки давлатда етишган мевалар бир-биридан фарқ қилмайди-да...
 
 
Ашт меваларни экспортига катта эътибор билан ёндашишини кўрдик. Ташкил этилган меваларни сақлаш омборхонасида иш қизғин, ҳосил пайти-да...
 
 
Ашт маркази Шайдон театрдан бошланади
Ашт туманининг маркази Шайдонга келдик. Туман ҳокимияти биносига яқинлашганимизда йўл четидаги театр биноси диққатимизни тортди. Балкида, эски маданият саройи театр номини олгандир, дедик ичимизда.
 
 
Туман ижроия ҳокимияти биносида ташрифимиздан сўнг, туман раиси Мирдадо Зариф Мирмуҳаммади, делегацияни театрга бошлади. Ичкарига қадам қўйдик-у, ичимиз ҳайратга тўлди. Ашт тумани марказидаги дунёнинг манаман деган театрларидан қолишмайдиган, уч йил аввал қуриб битказилган бу замонавий театр биноси, ҳақиқатдан ҳам Шайдон кўркига кўрк қўшибди.
 
 
Поп тумани делегацияси учун тайёрланган мусиқий тадбир эса, театр биносидан ҳам кўпроқ ўзига мафтун этди. Маҳаллий санъаткорлар ижросида янграган ўзбекча қўшиқларни тинглаб, уларнинг маҳоратига тан бердик, уларнинг Ўзбекистонга таклиф қилиб, концерт дастурлари ташкил этса, унча-мунча қўшиқчиларимиздан ҳам кўпроқ томошабинни ўзларига жалб эта олишлари кўнглимиздан ўтди...
 
Аксикон кўли бор экан, Ўлик денгизни нима қиласиз?!
Ашт дунёнинг ўзининг тузи билан машҳур. Ашт туз конидан қазиб чиқарилган ош тузи, сифати жиҳатидан халқаро миқёсда эътироф этилган, кўплаб танловларнинг “Гран-при”сини олган. Лекин яна бир жой борки Аштда, уни кўрган кишининг бу тупроқларга бўлган қизиқиши ортади.
 
 
Аксикон кўли... Тузли балчиқ билан даволаш маскани. Кўз ўнгингизда оппоқ туз билан қопланган катта майдонни кўриб, бир ҳайрон қоласиз, оёқ кийимингизни ечиб, замини юмшоқ бўлган туз устидан ичкари қараб кирсангиз, худди денгиз устидан юриб кетаётгандай ҳис қиласиз ўзингизни. Дунёнинг етти бурчагидан инсонлар Исроилдаги Ўлик денгизга боришади даволаниш учун, бироқ ундан хусусиятлари билан қолишмайдиган, балкида устун бўлган Аксиконни ҳамма ҳам билавермайди. Тери касалликлари, асаб касалликлари, нафас йўллари касалликлари билан оғриган инсонлар учун шундоқ биқинимизда, дўст мамлакатнинг қўшни туманида ажойиб даволаниш маскани борлигини кўриб, халқларимиз ўртасида яқинлашиш кучайган сари, бу ерга борадиган ватандошларимиз сони ортишига ишончимиз комил. Чунки, маҳаллий мутасаддиларнинг айтишича, собиқ иттифоқ даврида бу ерга даво излаб келганларнинг ярми Ўзбекистондан бораркан...
 
Қаторда норинг бўлса... Поплик тадбиркорлар Ашт ҳунар ўрганиш марказига моддий кўмак берадилар
Ашт туманида Тожик жамияти учун доимий воқеълик бўлган бир ҳолат эътиборимизни тортди. Тумандаги кўплаб ижтимоий аҳамиятга эга бўлган бинолар, объектлар ҳашар йўли билан барпо этилган. Масжидлар, дам олиш масканларини кўрдик бундай усулда дунёга келган.
 
 
Ашт марказида янги қуриб битказилган аҳолига ҳунар ўргатишга мўлжалланган Қўшимча таълим маркази ҳам шулар қаторида.
 
 
Поп делегациясига бу марказнинг қурилиш тарихини баён қилган Ашт тумани Раиси Мирдадо Зариф Мирмуҳаммади, 9 июнь куни Марказнинг очилиш маросими ўтказилишини айтгач, Поп тумани ҳокими Азамжон Султонов, “Қаторда норинг бўлса, юкинг қолмайди ерда. Модомики ҳашар йўли билан, фуқароларнинг моддий кўмаги билан шундай марказни бунёд этибсизлар, биз ҳам қараб турмаймиз. Очилиш куни Поплик тадбиркорлар келиб, Марказ учун ўз моддий ёрдамларини бериб кетишади” деди. Беғараз дўстликнинг яна бир нишонаси бўлган бу таклиф, миннатдорчилик билан кутиб олинди...
 
Худоёрхон саройи дарвозаси учун кесилган чинорлар бугун янада ҳайбат билан ўсмоқда
Ташрифнинг сўнгги нуқтасида, Поп тумани делегацияси шарафига Ашт раиси томонидан берилган зиёфат билан давом этдик. Энг қизиқарлиси, биз таклиф этилган маскандаги чинорларнинг тарихи бўлди.
 
 
Қўқондаги Худоёрхон саройи дарвозаси учун ёғоч қидирган усталар, Аштда ўсиб ётган чинорларни мақбул кўришади ҳамда улар кесиб, Қўқонга келтирилади. Кесилган чинорлар эса яна кўкариб, бугун осмонга бўй чўзиб ётишибди...
Ташриф ниҳоясида ўзаро совға-салом улашилди. Ўзбек чопон-дўпписи, адраси, лаганлари, туҳфа китоблар... Хуллас, Поп делегациясидан совға олмаган қолмади.
 
 
Ашт тумани раиси эса, янада ўзига хос совғалар билан Ўзбекистонлик меҳмонларга лутф кўрсатди. Ҳар бир меҳмонга алоҳида қутиларга Аштнинг ўригидан, гилосидан, ош тузидан, бодомидан, ҳаттоки усталар томонидан ясалган Тожикистонда машҳур тешаларидан ҳам солиб тортиқ қилишди...
Якунда икки давлат раҳбарига узоқ умр тилаб, халқлар ўртасидаги дўстликка кўз тегмаслигини сўраб, тинчлик ва омонлик доимо халқларимизга ҳамроҳ бўлишини ният қилиб қўллар дуога очилди...
Ташрифимиз оқшом соатларида ниҳоясига етди. Яна чегара ўтиш пунктига қадар бирга келдик. Хайрлашиш шунча узоқ давом этдики, Аштликлар меҳмонларни қўйиб юборгиси келмаётгандай, Поп делегацияси бўлса меҳмондўст ва биродар тожик диёрини тарк этгуси келмаётгандай туюлди...
Дилмурод Жумабоев,
Поп-Ашт-Поп

Биз Twitterда