Марказий банк “Тадбиркорлик фаолиятининг жадал ривожланишини таъминлашга, хусусий мулкни ҳар томонлама ҳимоя қилишга ва ишбилармонлик муҳитини сифат жиҳатидан яхшилашга доир қўшимча чора-тадбирлар тўғрисида”ги Президент фармони ва Ўзбекистон Республикасини янада ривожлантириш бўйича ҳаракатлар стратегиясида белгиланган вазифалар ижросини таъминлаш доирасида “Якка тартибдаги тадбиркорлар томонидан миллий валютадаги банк карталаридан фойдаланиш тартиби тўғрисида”ги низомга ўзгартиришлар киритди. Бу ҳақда Ўзбекистон Республикаси Марказий банки ахборот хизмати хабар бермоқда.
Унга кўра, якка тартибдаги тадбиркор бундан кейин ўзига берилган корпоратив банк пластик картасини бошқа шахсларга фойдаланиши учун бериши мумкин.
“Тадбиркорлик фаолияти эркинлигининг кафолатлари тўғрисида”ги қонунда тадбиркорлик фаолияти субъектлари барча ишлаб чиқариш чиқимлари қоплангани, солиқлар ва бошқа мажбурий тўловлар тўланганидан сўнг олган даромади уларнинг хоҳишига қараб ишлатилиши белгиланган. Мана шу мезондан келиб чиқиб, якка тартибдаги тадбиркор банк карталаридан ишлаб чиқариш, савдо, хизмат кўрсатиш, ишларни бажариш билан боғлиқ бўлган, умуман ҳар қандай харажатлар учун тўловларни амалга ошириши мумкин.
Бундай тўловлар амалга оширилганда тегишли тўловни терминал орқали қабул қилган хизматчининг имзоси ва “тўланди” муҳри қўйилган счётлар, квитанциялар, банкомат, инфокиоск ва терминал квитанциялари (слип, терминалнинг электрон ҳужжати) ҳамда қонун ҳужжатларига мувофиқ ҳисобот ҳужжатлари бўлиб хизмат қилади. Эндиликда, бунинг учун томонлар ўртасида, яъни сотувчи ва банк картаси эгаси ўртасида шартнома тузилиши талаб этилмайди.
