Тиббиёт соҳасида олиб борилаётган ислоҳотлар Наманган вилоятида ҳам ўз самараларини бермоқда. Бугунги ҳолатни аниқ таҳлил қилиш, беморларга хизмат кўрсатиш бўғинида мавжуд муаммоларни биринчи ўринда ечим топишига эришиш орқали вилоятдаги барча туманларда тиббий хизмат савияси ошиб бормоқда.
Вилоятнинг йирик туманларидан бири бўлган Попда сўнгги пайтларда туман марказий шифохонасидаги туғруқхонанинг замон талабларига мос бўлмай қолгани белгиланиб, янги 80 ўринли туғруқхона қурилиши бошлаб юборилганди. Куни кеча туман тиббиёт бирлашмаси томонидан янги бино қабул қилиб олинди. Келгуси ҳафта хизмат кўрсатиш бошланадиган бу замонавий бўлимдаги шароитлар ҳамда қулайликларга ҳавас қилмасдан илож йўқ.
Биринчи қаватда ўндан зиёд туғруқ столлари мавжуд бўлиб ҳар бири алоҳида хоналарга жойлаштирилган. Иккинчи қаватда 80 ўринли туғруқолди ва туғруқдан кейин ётишга мўлжалланган шинам жиҳозланган палаталар бор. Яна бир янгилик шу бўлдики, туғруқхона билан бирга қуриб битказилган патология бўлими биноси ўртасида ўтиш йўлаги ҳам барпо этилди.
