Наманган тумани аҳли дардини эшитиб, илк келган "Миллий Тикланиш" партияси вакиллари бўлишди

 
Наманган туманидаги Тепақиёт қишлоғида аҳоли учун маънавий-маърифий қадрият ҳисобланган Авлиё Бузрукхўжа мозори ҳудудига туман ҳокимининг халқ фикрини ўрганмасдан қабул қилган қарори билан мактабгача таълим муассасаси қурилиши режалаштирилаётгани ҳамда бу масалага қишлоқ аҳлининг муносабати ҳақида “Наманган тумани ҳокимига: "Президент "халқни норизо қилиб бўлса ҳам боғча қур" деяптими, ҳоким бува?” деб номланган материал эълон қилган эдик.
Эълон қилинган мақолага илк жиддий муносабат, мамлакатимизда маънавий ислоҳотларни амалга ошириш, миллий қадриятларимизни асраб-авайлашни ўзига дастур қилиб белгилаган Ўзбекистон “Миллий тикланиш” демократик партиясидан келди.
Бугун Ўзбекистон “Миллий тикланиш” демократик партиясининг Олий Мажлис Қонунчилик палатасидаги фракцияси аъзоси Шуҳрат Тўхтабоев, ЎзМТДП Наманган вилояти Кенгаши раиси Ғайратжон Тўйчибоев ҳамда партиянинг вилоят ва туман кенгаши депутатларидан иборат гуруҳ Наманган туманидаги Тепақиёт қишлоғига ташриф буюриб, Авлиё Бузрукхўжа мозори ҳудудида қишлоқ аҳли билан учрашув ўтказди.
“Миллий тикланиш” вакиллари, қишлоқ МФЙ раиси, қишлоқ оқсоқоллари, фаол аёллари иштирокида бўлиб ўтган суҳбат чоғида халқнинг бу ҳудудда мактабгача таълим муассасаси қурилишига бўлган муносабатини батафсил ўрганишди. Авлиё Бузрукхўжа мозори тарихи билан, қишлоқда яшовчилар учун бу масканнинг нечоғлиқ аҳамиятли экани билан танишишди.
Олий Мажлис Қонунчилик палатасидаги ЎзМТДП фракцияси аъзоси Шуҳрат Тўхтабоев, ички туризмни ривожлантиришнинг, маданий мерос объектларини муҳофаза қилиш ва улардан фойдаланишнинг давлат сиёсатида устувор ўрин тутишини таъкидлаб, катта бўлмаган инвестиция жалб қилиш орқали бу мозор ҳудудида ички зиёрат манзилгоҳини такомиллаштириш мумкинлигини айтиб ўтди. Бу орқали туманга ички турист оқимини шакллантириш мумкинлигини, бу эса маданий мерос объектлари сони кўп бўлмаган Наманган туманининг туризмдан фойда олиш имкониятларини бир неча бор ошириши мумкин.
 
 
ЎзМТДП Наманган вилояти Кенгаши раиси Ғайратжон Тўйчибоев вилоят, туман ва шаҳар кенгашлари ва депутатлари томонидан вилоятдаги маданий мерос объектлари ҳолати ўрганилгани, натижада 273 та моддий маданий мерос объектлари ҳақида ҳудудлар кесимида фото материаллар ҳамда улар ҳолатига доир маълумотлар жамланиб, ЎзМТДП Марказий кенгашига тақдим этилганини айтиб ўтди. Ғайратжон Тўйчибоев, Авлиё Бузрукхўжа мозори ҳам шу объектлар қаторига киритилишини партия ўз назоратига олишини, Ўзбекистон Республикасининг “Маданий мерос объектларини муҳофаза қилиш ва улардан фойдаланиш тўғрисида”ги Қонуннинг ижроси бўйича Ўзбекистон “Миллий тикланиш” демократик партияси вилоят Кенгаши томонидан халқ депутатлари туманлар Кенгашлари сессиялари кун тартибига масалалар киритиб келинаётганини таъкидлади.
Ўзбекистон “Миллий тикланиш” демократик партияси вакиллари, зиёратгоҳни сақлаб қолиш, масаланинг ечимида маҳаллий аҳоли фикрининг инобатга олинишини таъминлаш учун амалий ишга киришишди.

Биз Twitterда