Форс кўрфазидаги Ўзбекистон ороли кимга қарашли?

 
Дубай соҳилларига яқин жойлашган “The World” (“Дунё”) сунъий архипелагининг қатор сунъий ороллари ҳақида кўпчилигимиз эшитганмиз.
Жаҳонда энг катта ҳисобланадиган мазкур сунъий архипелаг Форс кўрфазида, соҳилдан бир неча километр олисда жойлашган умумий майдони 55 квадрат километр бўлган 300 та оролдан иборат. Бу оролларнинг ҳар бирининг майдони 1,4 гектардан 8,3 гектаргача боради.
Дубайда туризмни ривожлантириш жараёнида соҳилда янги бино қуришга имкон қолмаганини кўрган шайх Муҳаммад бин Рашид Ал-Мақтум бундай ғаройиб лойиҳага қўл уради.
Денгизга қум ташлаш орқали бунёд этилган бу ороллар дунёнинг йирик компаниялари, ишбилармонлари ҳамда машҳур юлдузлар томонидан сотиб олинган. Деярли ҳар бир сотиб олинган орол мулк эгасининг ўлкаси номини олган. Ёки сотиб олувчилар айнан ўз мамлакатлари номи берилган оролга харидор бўлишган.
Хусусан, британиялик миллиардер сэр Ричард Брэнсон “Буюк Британия” оролини, Turkey’s MNG Holdings ширкати «Туркия»ни, Zhongzhou International Holding Group (ZIHG) хўжайини Бин Ху эса «Шанхай»ни ва «Хитой» оролларини сотиб олишган.
Рус матбуотида куни кеча бу оролларга боғлиқ эълон қилинган бир материалда қизиқ фактга дуч келдик: “The World” архипелагида “Ўзбекистон” деб номланган орол ҳам мавжуд ва у “Қирғизистон”, “Қозоғистон”, “Афғонистон” ҳамда “Грузия” оролларининг ёнида жойлашган. Яна бир теваракдаги оролга Россиянинг Омск шаҳрига қиёсан “Омск” номи берилгани рус ОАВнинг диққатини тортган.
Энди савол туғилади: “Ўзбекистон” деб номланган оролнинг эгаси ким? Борди-ю, бирор ўзбек бизнесмени бўладиган бўлса, буни очиқ эътироф этиш даври келганини эслатмоқчимиз. Агарки, “Ўзбекистон” номи берилган бу ҳудуд бошқа бировнинг қўлида бўлиб, эртага у ерда турли бемазагарчиликлар марказлари қурилиши мумкинлигини эътиборга олсак, ўзбек ишбилармонларига ҳамда йирик компанияларга бу оролни ҳар қандай нархда бўлсин, сотиб олишни тавсия қиламиз.
Vodiymedia.uz таҳририяти ўлароқ бу масалага ойдинлик киритиб, Сиз ўқувчиларга тақдим этиш ниятидамиз.

Биз Twitterда