Сўнгги кунларда ўзбек матбуотига янги ҳаво кераклиги, телевидениеда танқидий-таҳлилий кўрсатувлар йўқлиги ва бу борадаги кўплаб камчиликлар ҳақидаги хабарлар кўпайиб кетди. Бу албатта давлатимиз раҳбари Шавкат Мирзиёевнинг 30 март куни ўтказган видеоселектор давомида телевидение соҳасини танқид қилганидан сўнг юз берди. Президент "Ахборот" кўрсатуви янгиланиши кераклиги ҳақида гапирди ҳамда журналистлар воқеаларни ёритишда "ура-урачилик"дан воз кечишлари лозимлигини айтганди.
Шундан келиб чиққан ҳолда Ўзбекистон бош вазири Абдулла Арипов томонидан Ўзбекистон Миллий телерадиокомпанияси (ЎзМТРК) раисига ахборот сиёсати бўйича янги ўринбосар тайинланди.
Бу лавозим туркум телевизион лойиҳалар муаллифи ва продюссери, тажлибали журналист ОАВ соҳаси эксперти Бобур Алихоновга ишониб топширилди.
Бобур Алихонов 1962 йилда таваллуд топган. 1983 йилдан бошлаб телевидениеда турли лавозимларда ишлаб келган. Ўз вақтида Ахборот дирекцияси директори бўлган Алихоновнинг сўнгги иш жойи UzReport канали бўлиб, бош продюсер лавозимида ишлаб келаётганди.
