Тавбадир Ватанга қайтмоқнинг йўли!
(ТУРЛИ ОҚИМЛАРГА, ПУЧ ҒОЯЛАРГА ИШОНИБ ЁКИ АЛДАНИБ
ХОРИЖГА БОРИБ ҚОЛГАН, БУГУН АРОСАТ ИЧРА ҒАРҚ БЎЛИБ,
ҲАЁТИ МАЗМУНСИЗЛИК КАСБ ЭТГАН ЮРТДОШЛАРИМИЗГА)
Сароб ваъдаларга учган ватандош,
Бегона тупроқни қучган ватандош,
Сотқинлик майини ичган ватандош,
Тавбадир Ватанга қайтмоқнинг йўли!
Ҳаётни эскидай суймоқ истасанг,
Болаликнинг ҳидин туймоқ истасанг,
Ўз халқинг меҳрига тўймоқ истасанг,
Тавбадир Ватанга қайтмоқнинг йўли!
Яқинларинг боши эгик юрмасин,
Ўтганларинг қабрида тик турмасин,
Етти пуштга хиёнатинг урмасин,
Тавбадир Ватанга қайтмоқнинг йўли!
Онанг берган сутин ҳалол қилмайди,
Ғурбат эл хоинни одам билмайди,
Фақат шайтонгина тавба қилмайди,
Тавбадир Ватанга қайтмоқнинг йўли!
Ватан – авф этгувчи, ки, Ватан – Она,
Унутма, ўзга юрт сенга бегона,
Киндик қонинг томган замин – ягона,
Тавбадир Ватанга қайтмоқнинг йўли!
Анвар ИКРОМОВ
