Бугун 10 сентябрь, эфиопиялик югурувчи Бикила ялангоёқ Рим Олимпиадасида ғолиб бўлган кун...

 
Ҳа, спортга қизиққан фарзандингизга бугун бир неча жуфтдан оёқ кийими олиб бераётганингизда, қайси маркадагиси муваффақият омили бўлиши ҳақида суриштираётганингизда, шуни унутманг: туғма истеъдодлар ялангоёқ ҳам рекорд натижа билан Олимпиада ғолиблигини қўлга киритишади. Худди Абеле Бикила каби...
Бундан роса 58 йил муқаддам, 1960 йил 10 сентябрда Италия пойтахти Римда марафон югуриши олдидан ҳамма Эфиопиядан келган йигитга қараб кулишдан ўзини тўхтата олмасди. Ўзи марафон мусобақасида иштирок этиши керак бўлган, бироқ жароҳат олганлиги сабаб қатнаша олмаётган ҳамюрти ўрнига стартга чиққан Абеле оёғига мос ўлчамда оёқ кийими топа олмасдан ялангоёқ югуришга қарор берганди. Римнинг қайноқ асфальт йўлларида 42 километрдан ошиқ масофани югурмоқчи бўлган африкалик спортчини мазах қилмаган қолмаганди. Бироқ...
Натижа: 2:15.16,2! Абеле Бикика жаҳон рекордини ўрнатган ҳолда Олимпиада чемпионлигини қўлга киритади. Ғолибликка асосий даъвогарлар рус спортчиси Сергей Попов, инглиз Артур Кейли ва бельгиялик Ауреле Вандендрисшелар бундай натижага тан бермасдан бошқа иложлари қолмайди...
Журналистларнинг “Нега ялангоёқ югуришга қарор қилдингиз?” деган саволига Абеле, “Дунё Эфиопиянинг қатъиятини ва жасоратини кўриб қўйсин, дедим” деб жавоб беради...
Бикиле кейинчалик 1964 йилги Токио Олимпиадасида ҳам яна жаҳон рекорди билан олтин медални қўлга киритади.

Биз Twitterда