Хитой, Бирлашган Араб Амирликлари ва Ўзбекистон томонлари бош қўшган мазкур лойиҳанинг умумий қиймати 25 миллион доллар бўлиб, бу ерда суткасига 1000 тонна юқори сифатли цемент ишлаб чиқариш йўлга қўйилади. Корхонадаги қурилиш-монтаж ишларига маҳаллий аҳоли вакилларидан 200 нафари жалб этилган. Келгусида эса бу ерда 400 та доимий иш ўрни яратилади.
“Поп цемент” вакиллари корхонани жорий йил сентябрь ойига қадар ишга туширишни режалаштирмоқда.
Поп туманида қишлоқ хўжалиги йўналишида интенсив усулда боғ яратиш, балиқ етиштириш, наслли эчкичилик ва қўйчиликни йўлга қўйиш, асаларичилик ва паррандачиликни ривожлантириш бўйича ўнлаб лойиҳаларга киришилган.
Жумладан, биргина «Замин элегант сервис» МЧЖнинг 4 гектар майдонда гидропоника иссиқхонаси, 60 гектар майдонда интенсив боғ, 2000 тонналик музлатгичли сиғим ва қорамолчилик хўжалиги ташкил этиш каби лойиҳаларининг умумий қиймати 15 миллион долларни ташкил этмоқда.
Саноат йўналишида эса тикувчилик ва трикотаж маҳсулотлари, нотўқима матолари тайёрлаш, темирни қайта ишлаш, гранитдан пардозли тошлар ишлаб чиқариш йўлга қўйилади. “Қувасой Лидер Рамс” МЧЖ томонидан эса қиймати 5 миллиард сўм бўлган томёпқич махсулотлари ишлаб чиқаришни ташкил этиш лойиҳаси ишлаб чиқилган.
Умуман олганда, туманда 2020-2022 йиллар давомида жами 142 та инвестицион лойиҳа амалга оширилиши кўзда тутилмоқда.
