Мирзиёев микрокредитлар бериш тизимини соддалаштирди Тадбиркорлар маҳалла раиси кафолати билан 9 миллионгача пул олишлари мумкин

Ўзбекистон президенти Шавкат Мирзиёев тадбиркорлик субъектлари ва аҳолининг кенг қатламларига микрокредитлар бериш тизимини соддалаштириш ҳақида қарор имзолади, бу ҳақда «Ўзбекистон» телеканалининг «Ахборот» дастурида хабар берилди.
Қарорга мувофиқ, қайта рўйхатдан ўтган якка тадбиркорларга ва оилавий тадбиркорлик субъектларига юридик шахс ташкил қилмасдан туриб, микрокредитлар ажратишнинг соддалаштирилган механизмини жорий қилиш кўзда тутилган. Уларга тадбиркорлик фаолиятини амалга ошириш учун сотиб олинадиган товарлар таъминоти сифатида энг кам ойлик иш ҳақининг 20 бараваригача миқдорда микрокредитлар ажратилади.
Қўшимча равишда қайта рўйхатдан ўтган якка тадбиркорларга ва оилавий тадбиркорлик субъектларига тадбиркорлик фаолиятини амалга ошириш учун фуқароларнинг ўз-ўзини бошқариш органлари кафиллиги асосида энг кам ойлик иш ҳақининг 60 бараваригача миқдорда микрокредитлар ажратиш амалиёти кенгайтирилади.
Марказий банкка бир ой ичида юқорида айтиб ўтилган микрокредитларни ажратишнинг соддалаштирилган тартибини тасдиқлаш тавсия этилди.
Қатор фаолият турларини (рўйхат кейинроқ эълон қилинади) амалга оширувчи якка тадбиркор ва оилавий тадбиркорлик субъектлари 2021 йил 1 январгача юқоридаги микрокредитларни расмийлаштирганда 6 ойгача муддатга қатъий белгиланган солиқ тўловидан озод этилади.

Биз Twitterда