Канадада яшаб ижод қилиб келаётган журналист, ўзбек матбуотининг афсона исмларидан бири бўлган Исмат Хушев Ўзбекистонда экани ҳақида хабар берган эдик. Республикамизда бўлаётган ижобий ўзгаришлар ва ислоҳотларни кўришга ошиққан Хушев, бугун Наманган вилоятида ҳам бўлди.
Наманган вилоятида амалга оширилаётган янги лойиҳаларни кезгандан сўнг, гурунгимиз бир пиёла чой устида давом этди. Эгнидаги “Наманган Истиқлол боғи” логотипи туширилган кийимни ечгиси келмай, Наманганда барпо этилаётган бу олашмумул иншоотнинг қурилиш жараёнига гувоҳ бўлганидан хурсанд ҳолда ўтирган Исмат Хушевни кўриб, Ватан севгисини нима эканини яна бир бор идрок этгандай бўлдик...
Очиғи, Исмат аканинг ҳар сўзида, ҳар нафасида Ватанга бўлган меҳр, ўзи туғилган тупроқларга олисда ҳис этилган соғинч, Ўзбекистон ҳавосидан баҳраманд бўлиш қувончи сезилиб турганига гувоҳ бўлдик. Юртимизда, хусусан Наманганда бўлаётган бу ижобий ўзгаришлар, шунча йиллар Канадада яшаб келган инсонни ҳам бунчалик ҳайратлантира олганидан севиндик...
- Наманганни ижобий ютуқларига “Дунё ўзбеклари” ҳар замон кенг минбар бериб келган. Кўрганларимдан кейин шуни ишонч билан айтаманки, нашримизда Наманган вилояти ҳаёти билан боғлиқ бундай материаллар яна кўпаяди. – деди Исмат ака.
Наманганга келиб палов емасдан кетиб бўладими! Ажойиб паловхонтўрани мақтаб-мақтаб тановул қилган Исмат аканинг, “Канадада, Америкада ҳар нарса бўлиши мумкин, лекин мана буни ҳеч қачон тополмаймиз”, деган сўзларидан юракка бир нима тиқилди.. Ватанни янада қадрлашга ўрганишимиз кераклигини эсга солди такрор бу сўзлар...
Дилмурод Жумабоев
