Ўзбекистон Молия вазирлигида Европа тараққиёт ва ривожланиш банки, The Coca-Cola Company (АҚШ) ва Coca-Cola İçecek ширкати (Туркия) вакиллари билан музокаралар бўлиб ўтди.
Учрашувда «Coca-Cola Ichimligi Uzbekiston Ltd» корхонасига стратегик ҳамкорни таклиф қилиш масаласи кўриб чиқилди. Ушбу масалани ҳал қилишда Европа тараққиёт ва ривожланиш банки ёрдам кўрсатиши мумкин.
Айни пайтда корхонанинг 57,1 фоиз акцияси «Ўзбекозиқовқатхолдинг» компаниясига, 42,9 фоизи эса The Coca-Cola Export Corporation корпорациясига тегишли.
«Coca-Cola Ichimligi Uzbekiston Ltd» қўшма корхонаси 1993 йилда ташкил қилинган. Бугунги кунда компаниянинг Ўзбекистонда 3 та: Тошкент, Наманган ва Урганчда заводлари бор.
Туркиянинг Coca-Cola İçecek ширкати, дунёнинг 19 мамлакатида 80 зиёд компанияни бирлаштирган “Anadolu Grubu” компаниялар гуруҳига тегишли. Агар Ўзбекистонда Coca-Cola корхонаси юзасидан келишувга имзо чекилса, “Anadolu Grubu” Марказий Осиёнинг беш давлатида ҳам ишлаб чиқариш қувватига эга бўлган биринчи компания бўлади.
2018 йил июль ойида Anadolu Grubu бошқарув кенгаши раиси, таниқли ишбилармон Тунжай Ўзилхан Ўзбекистонга ташриф буюриб, Бош Вазир ўринбосари Жамшид Қўчқоров билан ҳамкорлик истиқболларини муҳокама қилганди.
«Биз Ўзбекистонда бўлиб ўтаётган янгиликларни синчковлик билан кузатиб бормоқдамиз. Инвесторлар билан янгича ҳамкорлик стратегиясини тузиш, инвестицион муҳит учун қулай шароит яратиш, валюта бозорининг либерализация қилиниши, очиқ иқтисодиёт – буларнинг барчаси биз учун жуда катта аҳамиятга эга. Биз турли йўналишлардаги лойиҳаларни амалга оширишга ҳамда узоқ муддатли ва ўзаро манфаатли ҳамкорликка интилмоқдамиз», - деганди ўша учрашувда Тунжай Ўзилхан.
«Анадолу Груп» раиси турли хилдаги қўшма лойиҳаларни амалга оширишга, илғор малака ва янгича технологияларни устувор модернизация дастурларини амалга оширишга, саноат ва инфратузилмани техник ва технологик қайта қуроллантиришга жалб этишга тайёрлигини айтиб ўтганди.
Қолаверса, ўша учрашувда икки давлатнинг қишлоқ хўжалиги, соғлиқни сақлаш, текстиль саноати, замонавий қурилиш молларини ишлаб чиқариш каби йўналишларда ҳамкорликни мустаҳкамлаш бўйича дастлабки келишувга ҳам эришилганди. Мана, ниҳоят бу келишувларнинг дастлабкиси ҳаётга тадбиқ этилишга бошланади. Coca Colaни энди туркча ҳиссиёт билан ичамиз.
Ўзбекистон ва Туркия мамлакатлари ўртасидаги икки томонлама муносабатлар икки мамлакат раҳбарларининг ўзаро ташрифлари натижасида янги босқичга ўтди. Ўзбекистон ўз қардоши бўлган Туркия Республикаси билан савдо-иқтисодий ва инвестицион ҳамкорлигини кенгайтириш ва мустаҳкамлаш хатти-ҳаракатларини ўта қадрламоқда.
Дилмурод Жумабоев
