Дилмурод Жумабоев: "СЎЗГА ФАҚИР" ЎЗБЕКЧАМ

 
21 октябрь – Ўзбек тилига давлат тили мақоми берилган кун 
 
“СЎЗГА ФАҚИР” ЎЗБЕКЧАМ
 
Хориж юртлик бир маддоҳ
Мақтаб қолди тилини,
Эмиш: қатор сўзлар-ла
Олам билмиш элини.

- Тўғри, - дедим, - Ўзбекчам,
Эмас унчалик ҳам “бой”.
Сизнинг битта сўзингиз,
Таърифига бир бет жой.

“Террор”га муқобилни 
Топмаган Навоий ҳам.
“Негр” сўзин не билсин,
“Соддатил” биздек одам.

“Бомба”га йўқ таржима,
“Танк”ка ўзбек сўз излар.
“Автомат”-у, “торпедо” –
Ўзбекчаси йўқ сўзлар.

“Гей-парад” деган сўз йўқ,
Бунча ҳам “фақир” тилим.
“Лезбиян” деганини
Англолмай "ҳалак" элим.

“Героин”-у “кокаин” –
Ўзбекча умумий ном.
“Заиф”лигидан тилим
“Экстази” унда беном...

Тан оламан, Ўзбекчам
“Чангингизда” қолибди,
Тилингизнинг “бой”лиги
Жаҳонга донг солибди...

Шундай дедим тилимда,
Қалбда  ўзгача фикр:
Ўзбегим ўзлигини
Тилим асрабди, шукр!

Биз Twitterда